Doirmez påjhule (hosseuse da Hubert Fabry, 1932)

Divins vosse banse pitit mamé
Pitit andje å si doûs sorîre
Xhoûtez vosse mére, alons doirmez
Ca dji voe vni l' ome ås poussîres,
Serez vos oûys il est grand tins
Tinez, li ptiti Jezus les sere
Èt Lu, ni sereut nén contint
Si vos fjhîz del poenne a vosse mére

Doirmez c' est vos k' est l' pus sûti
Vos l' savez bén "mi ptit cint meye"
Dji so dlé vos, dji n' oize moti.
Po n' nén tourmeter vosse somey
Pus awoureus ki l' fi d' on rwè
Vos n' kinoxhrèz l' flatreye amére
Dizo mes båjhes gostez li rpois
Alons doirmez, xhoutez vosse mére.

Vosse banse n' est ni d' ôr ni d' årdjint
Vos draps n' ont nén l' froufrou del sôye
Les nôbes, les grands, les fåsès djins
Ni vnèt nén admurer vos djôyes
Mins do moens i n' eut nou soglot
A vosse naixhance k' est sin mistère
Èt tos mes amoûrs sont por vos
Èt vos sorîres sont po vosse mére

Por vos n' s' elîve nén dvins les airs
Des tchants djoyeus ki dji n' kinoxhe
Mins vz avez por vos les concerts
Des oujheas tchantant dvins les coxhes.
Drî les fis d' grands, des omes åemés (?)
Rôlèt des oûys rimplis d' colere
Dismetant ki, por vos, mamé,
I n' årè k' les cis di vosse mére.