E m'djîse! Qwand, après djoûrnêye faîte, dji rinteûre è l'coulêye Et qu'åtoû d'mi k'pagnèye dji r'troûve mi p'tite niyêye, Dji roûvèye qui por zèls dj'a d'vou dès-eûres durant Ovrer, trîmer timpèsse po l'zî gangnî leû pan. Mi djôye d'èlsè r'vèyî faît k'tchèssî mès mås d'tièsse, Mi front n'èst pus pleûtrî qwand dji m'sins d'vins leûs brèsses, Lès ponnes èt lès histous s'ènêrèt come å vint A l'doûceûr d'ine carèsse m'èwalpant tinrûl'mint. Mi pus grand rafiya c'st d'oyî leûs mèssèdjes... Et leûs mamés riyas m'avise on gruzinèdje. Ossu, bin pus-ureûs qu'ampèreur è s'palås, Dji n'donreû nin m'boneûr po l'forteune d'on ritchå. Et qwand l'eûre dè nåner lèzî clô leûs påpîres, Dji d'mande li gråce à diu divins'ne dièrinne priyîre: Qu'i porsûvèsse leû vôye onièsse, virlihe èt fwért Po qu'djènnè våye påhûle qwand vinrè l'eûre di m'mwért. José Kirkove (Herstal) 65émme annuaire "LE ROYALE CAVEAU LIEGEOIS".