Distcheyance (Jan-Pire Clovin, diviè les anêyes 1970) ============ [boket cåzé] El facteur, il a passé dins m' boesse Pu, ene evlope tote maxhurêye Â! Ça vént d' Marcinele! C' est djinti! Mmm... i metnut 30 francs asteure, I n' ont nén djoké d' rhôssî les timbes, Dji m' sovén cwand dj' a cwité m' payis, Dji meteu 9 francs. [çou ki shût est tchanté, c' est çou k' i gn a el lete] Èm tchir camaeråde, ça fwait lontins Ki dji voreu bén esse a vo plaece. Dji sai bén ki vos n' seroz nén contin Di sawè k' asteure on vike dins l' crasse. I gn a troes moes d' çoula ç' a stî m' tour, El patron n' a pus yeu dandjî d' mi. I m' a dit: «dji conè vos discours, vo feme, vos efants dins vo guerni». Jamwais, jamwais vos n' årîz polou l' croere, On a dvou vinde djusk' a nos årmweres, On a fwait come bråmint ds ôtes ayer On-z a doirmou dso des tôles di fier. Zabele, les efants eyet minme mi, On a brait eshonne ayer å niût. On-z a rçu des tikets po mindjî I gn a bén trop d' chômeus on les paye pus. Dj' end a co troes ki n' ont nén crexhu, Fåt bén k' leu scole leu paye a dinner On-z asprouvrè a shure el veye k' on shût Mi dji croe k' on djoû ça va sonner. On dit k' on årè on deur ivier, Po s' tchåfer on n' årè pus k' a boere. On croet k' bén rade ça va esse el guere, Ça serè el dierinne, on n' årè pus d' istweres. ???????? ni rvéns djamwais droci, I gn a pus k' el dezert a mostrer. S' i fåt shure el vikereye k' on shût, Dji croe k' on djoû ça va sonner.