Li Clokî d' Sint Lambiet (tecse del 17inme sieke) Vos avez distrût l' Catedråle, Avou s' bea åté, s' bea doxhåle, Sacadjî l' måsolé Markå, Ci vî prince k' a bati l' palå, Et çou ki m' fwait pamer d' tristesse, Et dressî tos les tchveas d' nosse tiesse, Kitrågné l' binamé crucifi Ki fwait l' djoye di tot l' paradis. Spiyî les clokes a côp d' cougneye Ki redjowixhît tote li veye: Disterminé l' pus bea clokî Ki måy del veye on-z åye loukî K' aveut ene croes des mî doreye, K' aleve cåzu djusk' ås nuleyes, Et pa dzo on dobe carilion Ki triboleve d' ene tele façon Ki sins bodjî foû di s' couleye On-z oyeve eure, cwårt d' eure et dmeye, Çou k' esteut ene comôdité, Des pus grande po tote nosse cité. On djetreut des låmes ossi grosses Ki les pus rôlantès pât' nosse Des tchaplets do vî fré Michi Totes les feyes k' on passe sol martchî Vos raece di geus, Diè mel pardone, Avîz vs li diâle e vos marone Ou araedjîz vs cwand vs abatîz On si bea et si hôt clokî? Ki n' avîz vs dvins vosse chabote Do stron d' aronde ou bén d' houlote, Ou ki n' vos cassîz vs turtos l' cô Cwand vs avez ferou l' prumî côp. Vos noers mivés, avez eveye Di n' pus fé k' on viyaedje di nosse veye Ki n' avez vs e coir li hawea K' a distrût on ovraedje si bea