Martin å Congo (Compost Binde)
==============
Cwand dj' a intré sôdård, dj' a segnî on papî,
po nd aler å Congo avou m' couzin Louwis.
Tcherdjîs come des bådets, on a prin l' avion
ou dj' a stî foirt malåde
et dj' a rnådé nouv côps.

Arivé dé les negues, dj' esteut fén frexh di tchôd,
dji tronnéve come ene foye
et dj' aveu des frumjhons,
dji catchive après l' air come fwaiynut les pexhons,
t' åreus cût des oûs dins mi scançon.

Après troes moes d' clinike, i m' ont leyî ndaler,
li colonel m' a dit: "Martin, vs estoz rtapé!".
I m' ont tant fwait d' picures tos ces apoticaires,
ki dj' a deus fesses trawêyes
ostant k' on cou d' passwere.

Com dji n' såreu m' ashir po ndaler al coulote
dji m' va padrî les håyes
cwand i m' fåt ponre ene crote
Et si dji låtche ene vesse avou les trôs di m' cu
dji skete tos les moxhons rén k' å brut.

Dins sacwants djoûs did ci dj' erirè a Nanene.
Ritrover l' cinse, les biesses eyet m' comere Djanene
Et dji m' va lyi mostrer çki l' årmêye m' a aprin,
ki dj' pou boere d' afilé
trinte vî-tins sins esse plin.

Cwand on srè dins les strins
et k' ele voerè m'n afwaire,
fårè lyi espliker ki ces mannetes di noeres,
m' on diné leu maladeye et k' vola li råjhon
di m' flotche ki rshonne a on potiron.