Mi Viye Måjhone =============== Come c' est bon do sinti les ouys di s' viye måjhone Vos taper ene loukeure on pô dvant d' s' essocter, Cwand l' zuvion dvins les fleurs do djårdén cråmignone, Et ki l' dierin clokî acheve do gruziner. Dj' inme do schoûter les bruts k' ont hossî les anêyes Ki dj' a passé djoyeus el wåde di ses vîs meurs, Dj' inme di m' ashir tot seu so li dfén del djournêye E corti tot pierdou dvins ses nouvès mousseures. Dimwin dji n' årè pus po serer mes påpires Ni les tchants des clouctreas påjhules et awoureus Ni les sospirs nåjhis des fagnes et des brouwires; Por mi l' ombe del vesprêye n' årè pus nou respleu Dj' årè po seu sovni, come on sondje ki vs dispiete, Les dierinnès sinteus d' ene souwêye mågriete da Monsieu Robert Rahier d' Embourg