On con trop lon (Compost  Binde)
===============
Les djins d' asteure n' sont jamwais pus contins:
elzîs fåt todi pus bea k' leus vijhéns.
On s' è fout des dispinses,
çou ki conte, c' est çk' on pinse!

Dedja po leus deus metes cwårés d' paxhî,
i tondnut avou on tracteur, ashids;
ça n' est nén foirt pratike,
mins c' est bråmint "plus chic".

Tas d' debiles, imbeciles,
l' bouneur ni s' muzeure nén
e biyets d' mile.
I sont tot, åtoû d' nos,
et n' riyoz nén d' trop,
sont ptete a costé d' vos.

I mougnnut tos les djoûs do ptit salé,
po payî e cénk ans leu BMW
avou l' mobilofone
k' est nén min racoirdé!

S' i dijhnut k' l' ont stî ås iyes Cayman,
fåt comprinde "å campigne di Marbehan".
I n' evoynut pont d' cåte,
po nén fé djalot les ôtes.

Tas d' grosses biesses, rén dins l' tiesse,
c' est vraiy k' avou l' culture
on n' frè jamwais do bure.
I sont tot, åtoû d' nos,
et n' riyoz nén d' trop,
sont ptete a costé d' vos.

Frimer est leu seule rilidjon,
minme si les djonnes ont fwait leu cominion.
S' i vont a messe li dimegne å matén,
c' est po mostrer leu novea Lacoste... di segonde mwin!!!

C' est l' måleur des docteurs,
i s' sognnut avou l' live "guérir avou les fleurs"
Tas d' bezins, enocins,
i s' payront l' meyeu curé,
cwand fårè les rpiker.

Atincion! Tos ces cons,
sont co pus mwais avou kepi et cinturon.
I sont tot, åtoû d' nos,
et n' riyoz nén d' trop,
sont ptete a costé d' vos.