I tome avå l' tchôdemarke plinte di Rwès målereus
Hapés e cép des Rinnes mignantes et dånêyes.
Tot s' diespiertant dvins l' froed, i voet k' il est mierseu...
I n' comprind nén pocwè i piede si binamêye...
Li Chevalier s' anoye, chal i n' a pus nolu...
L' aiwe lyi court foû des ouys, pieles di miråcoleye...
Et les fleurs sont flouweyes, les oujheas n' tchantèt pus...
Tot rénant come on spér, i cwire co après leye...
Dispoy, al plinte Leune,
Li Chevalier rivént...
Harlikins, Pourichinels
Avou lu plorèt
L' Amour et s' forteune
Pierdowe avå les Tins..
Leus-warous a ribambele
Avou lu tchoulèt...
Les Blankès Dames et les Macrales
Di Cir mousseyes so l' aile do Vint,
Volèt dvins l' nute ås Stoeles d' årdjint
Blankès Dames et Macrales...
Leus tchanson rmouwe minme l' åme do Diâle,
Pus bele ki l' cisse do Råskignou,
C' est ene tchanson ki rind bablou...