Doirmez påjhule (hosseuse da Hubert Fabry, 1932)

Divins vosse banse pitit mamé
Pitit andje å si doûs sorire
Schoûtez vosse mére, alans doirmez
Ca dji voe vni l' ome ås poussires,
Serez vos ouys il est grand tins
Tinez, li ptit Djezu les sere
Et Lu, n' sereut nén contint
Si vos fjhîz del poenne a vosse mére

Doirmez c' est vos k' est l' pus sûti
Vos l' savez bén "mi ptit cint meye"
Dji so dlé vos, dji n' oize moti.
Po n' nén tourmeter vosse somey
Pus awoureus ki l' fi d' on rwè
Vos n' kinoxhrez l' flatreye amére
Dizo mes båjhes gostez li rpois
Alons doirmez, schoûtez vosse mére.

Vosse banse n' est ni d' ôr ni d' årdjint
Vos draps n' ont nén l' froufrou del soye
Les nôbes, les grands, les fåsès djins
Ni vnèt nén admurer vos djoyes
Mins do moens i n' eut nou soglot
A vosse nexhance k' est sins mistére
Et tos mes amours sont por vos
Et vos sorires sont po vosse mére

Por vos n' s' elive nén dvins les airs
Des tchants djoyeus ki dji n' kinoxhe
Mins vs avez por vos les concerts
Des oujheas tchantant dvins les coxhes.
Drî les fis d' grands, des omes må inmés
Rôlèt des ouys rimplis d' colére
Dismetant ki, por vos, mamé,
I n' årè måy k' les cis d' vosse mére.